زجل مغربي :
// ... كية اللي تبع اهواه ...//
قالوا غي سير ع الله
راه الحاضي الله
كان الطاوس سارح
و الذيب رابض وراه
فجنب الواد
بين شعابو و خلاه
يتسنى الصبيان يجوعوا
و جوعو لا حد بغاه
يمَضِّي الناب
و يوَجَّد المخالب معاه
و الطاوس ما ساق اخبار
و لا من آمرو و نهاه
بقى هايم غادي تابع
خاطرو و فين اداه
و الذيب قاني حاضي
ما همو حسنو و بهاه
عينو على لحمو و شحمو
و لعابو سايل وراه
حتى لقى راسو وسط الدوار
بين الصبيان و الناس حداه
ها اللي يضرب بحجر
ها اللي بوتد اجبد معاه
ها اللي ساد لمسارب
ها اللي بعصاتو أتاه
مسكين تماوت و غاب
حتى قالوا هاد الشي يكفاه
لاحوه بحال شي جيفة
من جرف عالي و سماه
و فالسفح ناض و قال :
( كِية اللي تبع اهواه
يخَليها واجدة موجودة
و يقَلَّب على سباب رزايتو و خلاه )
زجل : عبد القادر اليوسفي
-------------------------------------------------------------------------
كية : يا ويل
الحاضي : الحارس و الحامي
يتسنى : ينتظر
بغاه : أراده
يمضي : يشحد
يوجد : يهيئ
ما ساق اخبار : ظل في غفلة
فين اداه : أين هام به
قاني حاضي : قائم بحراسة مشددة
حداه : بجانبه
اجبد معاه : ضربه بقوة
لمسارب : المسالك الضيقة
لاحوه : رموه
بحال شي جيفة : مثل الجيفة
يخليها واجدة : يتركها مهيأة و سهلة
يقلب : يبحث
رزايتو : مصيبته و نكبته
خلاه : خلاؤه أي دماره و هلاكه
ليست هناك تعليقات:
إرسال تعليق